كفاية مظاهرات...يلا نتكلم فى الجد

الثورة قامت عشان الحقوق اللى ضاعت ومرجعتش وعشان صوت الناس اللى مبيتسمعش وعشان حال البلد اللى واقف مبيتقدمش، الحال مبيتغيرش فى شهر ولا شهرين ولا الحقوق كلها هترجع بمظاهرة ولا مظاهرتين عشان كده ابتدينا نبص لقدام....الثورة قامت عشان التغيير وأول خطوة على طريق التغيير هى الانتخابات الجاية، مجلس شعب من غير تزوير، مجلس شعب بيمثل الناس بجد لأن كلنا شاركنا فى اختيار اعضائه، مجلس شعب عارف مسؤولياته لأن الناس وهى بتختار نائبها قالتله على همومها ومشاكلها، والناس نفسها اللى هتحاسبه لو قصر فى حقها.

ده هدفنا باختصار، لكن لو عايز شوية تفاصيل فأهدافنا هى:
1-تعريف الناس بأهداف الثورة ما تحقق منها وما لم يتحقق بعد.
2-رفع مستوى الثقافة السياسية للناس عن طريق تعريفهم مثلا بمصطلحات سياسية ممكن تكون مبهمة (ليبرالية، دولة مدنية، القائمة النسبية...) ممكن تأثر على شكل اختيارهم الانتخابات الجاية.
3-تدريب للرقابة على الانتخابات.
4-تتبع خلفيات المرشحين وتعريف الناس بيهم.
5-تعريف الناس بالأحزاب المختلفة وخاصة الجديد منها.

ارجوك متستسهلش انك تقرا الكلام وتمشى، لو مش هتشارك قولنا ليه، حاسس انه كلام فاضى، مش هيأثر؟ ولا انت فاهم الكلام ده وفاكر الناس كلها فاهمة زيك؟ ولا مش فاضى؟ احنا مش هناخد من وقتك كتير، ممكن تقتصر مشاركتك على انك تقولنا رأى اصحابك والناس اللى تعرفهم او تقترح علينا اقتراح، شارك بأى شكل يناسبك.

حاجة أخيرة..يهمنا اللى يشاركو معانا يكونوا من كل حتة ف اسيوط ومن كل مراكزها عشان نقدر نوصل لأكبر عدد من الناس.

لو عايز تشارك ابعتلنا ع الايميل ده ebny.masr[at]gmail[dot]com